Á landleið.

Sælt veri fólkið, nú er þessum túr að verða lokið, komnir með rúm 600 tonn af heilfrystum kolmunna í frystinn hjá okkur og ættum að vera búnir að fylla hann í fyrramálið.

Lögðum af stað áleiðis til Neskaupsstaðar seinnipartinn í gær og er áætlað að vera komnir þangað aðfaranótt þriðjudags og er áætlað að landa í bræðslu þá um nóttina og í frost í kjölfarið. 

Túrinn búinn að ganga mjög vel, ágætis veiði og veðrið eins og best verður á kosið.

Gullkorn dagsins verður: "Fáir gráta lengi annars ógæfu."

Múffi kveður.

Hákons-fréttir!

Jæja gott fólk af okkur er bara allt gott að frétta vinnsla og veiði ganga ágætlega. Erum komnir með um 350T í frystinn hjá okkur og með sama áframhaldi ættum við að geta verið búnir að fylla á þriðjudag. Veðrið er eins og best verður á kosið sól og blíða.

Gullkorn dagsins verður að þessu sinni: "Fyrsta andvarp ástarinnar er síðasta andvarp skynseminnar."

Nóg í bili Múffi kveður.

Blíða á kolmunnamiðunum!

Jæja sælt veri fólkið. Siglingin hingað suður á Rockhall-svæðið gekk "bara vel". Það er eiginlega ekki rétt að kalla þetta Rockhall svæðið  því við erum reyndar staddir um 240 sml vestur af Írlandi og eru þar af leiðandi langt fyrir sunnan Rockhall-klettinn. 

Fengum ágætis afla í morgun sem ætti að duga okkur í vinnslunni næsta sólahringinn. Hver einasta kolmunna-padda heilfryst til að ná sem mestu verðmæti út úr þessu á þessum síðustu og verstu tímum.

Það er búin að vera einmuna veðurblíða á miðunum síðustu daga og er útlit fyrir áframhald á því. Þessi blíða er mjög sérstök á þessum árstíma,  bloggritari man bara ekki eftir að hafa verið á þessum miðum nema í leiðinda skakstri flesta daga, er á meðan er.

Gullkorn dagsins verður: "Sá sem þiggur gjöf ætti aldrei að gleyma því; sá sem gefur, ætti  aldrei að muna eftir því."

Múffi kveður að sinni.

Loðnuvertíðinni lokið hjá okkur þetta árið.

Sælt veri fólkið. 

Hún dugði skammt þessi litla viðbót sem okkar elskaði og dáði sjávarútvegsráðherra  gaf út á dögunum. Það lítur út fyrir að vertíðin sé búin hjá okkur þetta árið, lönduðum í borg óttans í gær og í fyrradag, síðustu tonnunum okkar þetta árið. Það er víst alveg útséð með að ekki verði gefinn út meiri loðnukvóti þetta árið.

 Fórum frá Reykjavík um miðnættið í gær áleiðis austur á Eskifjörð og er ætlunin að setja nótina í land þar og taka um borð troll til kolmunnaveiða. Ætlunin er að sigla suður á Rokchall svæðið og reyna fyrir sér á kolmunnaveiðum.

Gullkorn dagsins verður:"Eiginmaður er misheppnaður piparsveinn."

Múffi kveður að sinni.

Er Múffi á kafi í loðnu??? Þetta voru baaara 20000, tonn!!!!!

Góðan dag til lands og sjávar! ekki grunaði mig að þetta rausnarlega útspil viðreisnar-húfuráðherrans hefði í för með sér  svo langt fréttafall frá Múffa og félögum, en þeir eru vafalaust að gera sem allra mest verðmæti, líkt og áður úr þessum vart trúanlega viðbótarkvóta hafró-spekinganna og ekki var ráðherrrrran að lífga hugmyndina!! hvað þá úthlutunina!! Undarlegt að þeir félagar sýndu ekki enn meiri nákvæmni og settu þetta 20010 tonn svo undirstrikað væri rækilega hversu nákvæmt sé unnið á þessum þjóðhagslega uppbyggilegu stofnunum okkar á þessum hruns tímum. Það er ekki vandamálið að svína á þeim sem ekkert fengu í sinn hlut á upp og útgangsárunum en eru nú kúgaðir til að borga tapið og eru ekki bankarnir að innheimta  lánaskuldir af aðilum hér heima sem þeir tóku erlendis fyrir þeirra hönd  og  losnuðu svo   við með gömlu bönkunum, ekki eru þeir að borga af þessum 14000 miljörðum sem þeir skulduðu erlendum fjármálafyrirtækjum, en innheimta grimmt af aðilum hér heima til að byggja upp sjóði sína og kanski til að borga útrásar drullusokkum og ríkisstarfs-dátum!! sem sagt er að hafi sofið á verðinum!! það er jú svo saklaust að sofa!!!!??? Saklausara en að viðurkenna að vitneskjan um hörmulegt ástand var löngu áður á vitorði  ríkisstjórnar, fjármálaeftirlits og seðlabanka, en þeir bara LUGU  að almenningi og gerðu ekkert af því sem að gagni hefði komið,  því þá var fyrirsjáanlegt að stór gjaldþrot yrðu sem hefði að öllum líkindum orðið mun vægari en raunin  varð! með því að bíða eftir kraftaverki!!!  því varð hrunið og allt sem því  hefur fylgt svo margfallt meira. En ef til vill verður það til þess að upp á yfirborðið komi fleiri refsiverð atriði sem  viðhöfð voru á einkaþotu-árunum.  Vonandi tekur Jónsi  karlinn ofan húfuna í dag og gefur út  100.000, tonn í viðbót ?????? Það getur ekki riðið stofninum að fullu, en gæti bætt álit margra í landinu á hans ákvörðunum, þegar á öllu má skiljast að í þjóðarbúið vanti verulega ef ekki sárlega gjaldeyrisskapandi verðmæti . Gangi vel Hákons-menn!!!

                                                                Kv /Seán                                     

Jólasveinninn í Sjávarútvegsráðuneytinu.

Sælt veri fólkið. Lönduðum í gær í Neskaupsstað rúmum 700 tonnum af frystri loðnu.  Erum nú á leið á miðin í okkar síðasta loðnutúr á þessari vertíð. 

Kvótaaukningin sem okkar elskaði og dáði sjávarútvegsráðherra gaf út á dögunum  gerir það að verkum að við fáum 400 tonna viðbót. Það ætti nú að nást í einu kasti, guð hjálpi okkur ef kastið verður stærra!  Það var flott viðtalið sem tekið var við okkar elskaða og dáða sjávarútvegsráðherra að kvöldi þess dags sem aukinn loðnukvóti var gefinn út. Hann var ekki ósvipaður  jólasveini sem nýkominn er af jólaballi leikskólans og búinn að gefa litlu börnunum pakkann sinn. Svo virtist fréttamaðurinn ekkert vera að gera sér grein fyrir því sem verið var að fjalla um. Engin spurning um hvað þessi aukning þýðir? Hvernig er staðið að mælingunni á stofninum? Engin gagnrýnin umfjöllun um starfsemi og starfsaðferðir hjá Hafró. Þar virðist ákvörðunin vera tekin af einum manni, ávörðun sem eðlilegt væri að fleiri menn tækju ábyrgð á.  Nei þessi þjóð getur ekki verið á hausnum að láta verðmætin fara svona framhjá sér. En hvalirnir þeir lifa góðu lífi þessa dagana, skildu þeir vita að þeir verði að skilja eftir 400 þús. tonna hrygningarstofn?

Gullkorn þessa dags verður: "Enginn maður er alltaf vitur."

Múffi kveður að sinni.

 

Meiri loðnukvóta strax!

Jæja gott fólk þá erum við komnir á landleið úr þriðja loðnutúrnum þessa vertíðina. Tókum fyrsta kastið í þessum túr rétt vestan við Ingólfshöfða síðastliðinn sunudag. Fengum svo gefins frá færeyska skipinu Norðborg um 160 T í gær rétt austan við Vestmannaeyjar. Í dag tókum við svo sjálfir eitt kast um hádegi í  sem gaf okkur um 120 T. Erum við þá komnir með nægt hráefni til að frysta og ættum að ná að landa um 700 T af frosinni loðnu í Neskaupsstað næstkomandi föstudag.

Svo er bara spurning með framhaldið. Hafa menn þann dug  í sér að gefa út meiri kvóta áður en það verður um seinan. Í  þessu tilfelli er hik sama og tap.  Ég er viss um að þessir ágætu fiskifræðingar okkar séu að vinna vinnuna sín af alúð og samviskusemi en spurningin er var það ekki bara loðnan sem þeir sáu sem þeir töldu? Eða voru þeir að telja loðnuna sem þeir sáu ekki?

 Í okkar tilfelli eru um 350 T eftir af kvótanum og ef allt gengur eftir verðum við búnir að veiða það næstkomandi mánudag. Það er algjört stórslys ef skip sem er búið að vera að frysta fyrir hátt í 200 milljónir á 19 dögum skuli þurfa að stoppa á meðan að misvitrir stjórnmálamenn draga lappirnar í að taka ákvarðanir. Bloggritari skorar á sjávarútvegsráðherra að taka strax ákvörðun um að auka loðnukvótann  áður en það verður of seint.  Loðnan er ekkert að bíða.

Gullkorn dagsins verður að þessu sinni: "Þeir eru svo fáir, sem verða nokkuð vegna þess, að þeir eru svo margir, sem ímynda sér, að þeir séu eitthvað."

Múffi kveður.

Loðnutúr nr. 2 lokið.

Jæja gott fólk lönduðum loðnufarmi nr.2 í Neskaupstað í gær tæp 700 T af frosinni loðnu á Rússland. Fórum frá Neskaupstað aftur á miðin um ellefu leitið í gærkvöldi. Okkur skilst að fremsti hluti göngunnar ,sá er við veiddum úr í síðustu viku, sé kominn inn á Faxaflóa. Ætlum að reyna að finna aðra göngu á leið okkar vestur með landinu og vonumst við til þess að hrognafyllingin í þeirri göngu sé ekki eins langt á veg komin og í fremstu göngunni.

Gullkorn dagsins í dag verður: "Sönn vinátta er eins og góð heilsa. Gildi hennar kemur ekki í ljós fyrr en eftir að hún tapast."

Múffi kveður að sinni.

Frumburar og örverpi.

Sælt veri fólkið.

Köstuðum tvisvar í gær og fengum ekkert út úr fyrra kastinu en úr seinna kastinu fengum við í allar lestar og áttum afgang sem dælt var um borð í Börk NK. Þannig að við erum með nóg hráefni fyrir vinnsluna næstu daga. Reyndar urðum við fyrir vonbrigðum með hve lítið hlutfall var af hrygnu í þessu kasti  sem gerir það að verkum að ekki svarar kostnaði að vera að frysta á Japansmarkað þannig að Rússarnir njóta bara góðs af.

Bloggritari þakkar fyrir innsendar athugasemdir og kveðjur. Í kjölfarið á einni kveðjunni vaknaði sú spurning hver væri örverpið hennar Ástu. Eftir töluverðar fyrirspurnir í hópi yngri manna um borð þá reyndist örverpið vera maður á fimmtugsaldri og svarar nafninu "Boris". Í kjölfarið urðu heilmiklar umræður um það hverjir væru örverpi og hverjir væru frumburðar. Talað var um að stofna samstöðufélagskap örverpa og frumbura. Reyndar vildu frumburarnir ekki vera í félagi með örverpum einhverra hluta vegna. Brytinn okkar vildi stofna félag einbirna þar sem hann tilheyrir í raun báðum hópunum.

Annars bara létt yfir mannskapnum nægt hráefni fyrir vinnsluna og frystingin gengur vel.

Gullkornið að þessu sinni er:  "Konur elska hinn sterka og þögla mann, vegna þess að þær halda að hann sé að hlusta".

Múffi kveður að sinni.

Búnir að landa fyrsta túrnum.

Sælt veri fólkið, lönduðum fyrsta loðnufarminum í Neskaupsstað í gær 700 tonn af frosinni loðnu sem væntanlega fer á Rússlandsmarkað.

Fórum frá Neskaupsstað um níu leitið í gærkvöldi og siglum hér hraðbyri vestur með landinu. Ætlum að reyna að ná einhverju fyrir myrkur í dag. Loðnugangan er víst kominn vestur undir Þjórsárósa og hrognafyllingin í henni orðin 17% þannig að það er eins gott að hafa hraðar hendur ef menn ætla að ná að frysta eitthvað á Japansmarkað.

Einkennilegt að skip Hafró séu bundin við bryggju þessa dagana en ekki að leita af meiri loðnu því ef þetta er eina gangan sem væntanleg er þessa vertíðina þá er nú ekki langur tími til stefnu.

Annars allt gott að frétta af körlunum allir vel haldnir, nema kannski Arsenal áhangendurnir en þeirra lið steinlá fyrir hinum ofursterku og knáu Chelsea-mönnum í gær.  Enda voru bara pulsur í pottunum í gærkvöldi.  En þær runnu ljúflega niður.

Gullkorn dagsins verður: "Margir koma ekki auga á hamingjuna, því hún kostar ekkert."

Múffi kveður að sinni