Smáfréttir

Sælt veri fólkið. Lítið að frétta af okkur, verðum komnir á veiðislóð í nótt.  Karlarnir köstuðu trollinu í dag svona til að prófa búnaðinn og strekkja á gröndurum.

Annars er mannskapurinn bara slakur og styttir sér stundir við kvikmyndaáhorf. Svo er mottukeppnin í fullum gangi og margir orðnir nokkuð smekklegir.

Doddi kokkur er búin að vera með ákveðið súpuþema í matargerð núna síðustu daga. Í  gær fengum við í hádeginu tvær gerðir af súpum annarsvegar sveppasúpu og hinsvegar brokkolisúpu. Í dag fengum við svo fiskisúpu ,mjög góða,  og aftur brokkolisúpu ásamt  nýbökuðu brauði.   Kunnum við Dodda kokki  bestu þakkir fyrir.

 

Gullkornið er: "Eyðslufrek kona er verri en eldur í búi"

Múffi kveður yfir og út.

Kolmunnaveiðar enn og aftur.

Sælt veri fólkið.  Lönduðum síðusta loðnufarminum okkar á þessari vertíð í Reykjavík á mánudaginn.  Því miður virðist ekki ætla verða gefinn út meiri kvóti þannig að nú er bara að snúa sér að kolmunnanum.  Fórum frá Reykjavík áleiðis á kolmunnamiðin vestur af Írlandi um fjögurleitið aðfaranótt þriðjudags.

Túrinn byrjaði nú ekkert voða vel hjá okkur, bæði sími og netbúnaður bilaðaður. Tókst samt að virkja fjórar tölvur inn á net með aðstoð úr landi en símasambandslaust verður væntanlega við okkur þennan túrinn. Sérfræðingarnir í landi kalla þetta víst "Hardware problem". 

Múffi kveður með gullkorni dagsins:

" Ef þú getur haldið ró þinni þegar aðrir eru að fara á taugum er það vegna þess að þú skilur ekki hvað um er að vera"

...og þá var sagan öll......

Sælir góðir hálsar. Maður þyrfti nú helst að blogga á hverjum degi svo hratt gerast hlutirnir þessa dagana. Eftir löndun í Helguvík smelltum við okkur á loðnumiðin en það tók okkur ekki nema rúma tvo tíma. Nældum við okkur í tæp 500 tonn af þessari úrvalsloðnu og mátti ekki tæpara standa því við vorum rétt að klára að renna í gegn síðustu sporðunum af því sem við fengum á mánudeginum. Erum langt komnir með að vinna þessi 500t, hrignan flokkuð frá í kreistingu, og verður kastað núna þegar fer að birta. Það verður væntanlega síðasta kastið okkar á þessari loðnuvertít!!!!! Það hefur eitthvað að gera með markaðsmál og söluhorfur til rússanna, það fer eitthvað illa í þá að borða kafloðna loðnuhænga. Fyrir þá sem ekki vita þá tekur hængurinn stórum breytingum þessar vikurnar sem hrygningartíminn stendur yfir.  Hann dökknar mikið og á hann vex einhverskonar hárrönd á báðar hliðar eftir endilöngum fisknum. Og fyrir vikið virkar hann mikið stærri og stæltari. Er þetta eitthvað sem konur kannast við í fari okkar karlmannanna?.  Þá fer maður að setja punktinn fyrir aftan þessi skirif í dag og Marri segir yfir og út.

Es. Læt hér filgja með mynd af rússnesku eftirlitsmönnunum. Eða kannast einhver við þá?

 

 

 

Kornið: Barnið er lykill sá, er upplýkur hjörtum mannanna, af öllum stéttum karla og kvenna, auðugra og fátækra í öllum löndum.

Ó Helguvík, Ó helguvík........

Erum í þessum skrifuðu orðum að leggjast að bryggju í Helguvík. Erum að fara að landa loðnu í hrognatöku. Þetta er nú sólarhring fyrr en ég ætlaði en það kemur til af því að það var meiri hrygna í seinna kastinu en því fyrra. Strákarnir stóðu sig vel í frystingunni síðasta sólarhringinn en þá fóru 158,4 tonn niður í frystinn og er það með því mesta sem afköstin leifa. Til hamingju með það strákar. Og þá segir Marri yfir og út:)

Kornið; Sorgin er Guðs verk, en áhyggjurnar sköpum við okkur sjálfir.

Það var þá nóg af loðnu eftir allt...........

Góðan dag gott fólk! Það hefur nú gengið á ýmsu frá síðustu færslu.  Rifum nótina nokkuð illa sl. laugardagskvöld og var farið inn til Rvíkur með hana til viðgerðar.  Við notuðum tækifærið og lönduðum 460 tonnum af afurðum og vorum komnir á loðnumiðin í gærmorgun. Fengum ágætis afla í gær og erum að frysta á rússann og flokka kellinguna (hrygnuna) frá sem á svo að landa í kreistingu í Helguvík.  Það verður væntanlega á fimmtud. eða föstud. Seinna kastið okkar var það gott að við vorum aflögufærir um nokkur tonn og dældum tæpum 300 slíkum í Börk NK og læt ég fylgja með mynd af því. Annars er allt gott af okkur hér. Það er búið að starta mottu keppni og taka ótrúlegustu menn þátt. En eins er þó sakknað á meðal keppanda,  en það mun vera Golli Jó. ( Golli er ekki búið að skera þig upp við kviðslitinu?) Marri segir yfir og út með þeim orðum.

 

 

                                                                                        Börkur að þiggja. 

Kornið: Heilbrigt hjónaband er ekki fyrst og fremst byggt á hreinskilni, heldur miklu fremur á skynsamlegri þögn.

Vantar meiri kvóta.......

Allt gott af okkur hér á Hákoni:) Fengum ágætis kast í fyrrakvöld af loðnu sem var frystingarhæf á Japan. Kláruðum í nótt að flokka hana og birjuðum að frysta á rússann. Hrognafyllingin var komin upp í 23% og þar með að fara yfir mörkin sem japsarnir setja. Þá sjáum við væntanlega á eftir þeim félögum Tanaka og Taka sem eru eftirlitsmenn kaupanda  hér um borð.  Áttum bara um 1100 tonn eftir af kvóta þegar þessi veiðiferð hófst þannig að það verður harla lítið eftir þegar henni lýkur. Nú bráðvantar að gefa út meiri kvóta og vonandi bera þessir fræðingar gæfu til þess. Og með þessum orðum segir Marri yfir og út.

 

                                                                      Tanaka og Taka

 

Kornið: Vertu vingjarnlegur við fólk á leið þinni á toppinn því þú átt eftir að hitta það á leiðinni niður.

Loðna, loðna, loðna......

Jæja gott fólk þá kemur loksins meira blogg. Það fór eins og undiritaður grunaði:) Það er nóg loðna í sjónum, bara að sýna þolinmæði.  Annars eyddum við einum og hálfum sólarhring í höfuðborginni meðan óvissuástandinu varði. Yfirgáfum höfuðstaðinn kl.17:30 í gær eftir að búið var að aflétta loðnuveiðibanninu og vorum komnir á miðin austan við Eyjar í nótt. Guðjón kallinn var ekki að tvínóna neitt við hlutina og setti í rúm 300 tonn og er vinnsla þegar hafin. Hrognafylling er uþb. 23% og sleppur það til á Japan.  Það má segja að miklir peningar hafi tapast á þessu stoppi, bara hér um borð hefði verið hægt að frysta 600 tonn á þessum tíma!!!  Marri segir yfir og út og gangið á guðs vegum.

Kornið:Feitt borðhald gerir magran arf.

Rannsóknaskipið Hákon...

Lítið af okkur hér. Lönduðum í Nesk á laugard. uþb. 750 tonnum þar af 300 tonnum af japansloðnu. Fórum frá Nesk. um kl. 23 á laugardagskvöldi til "loðnuleitar" en megum ekkert veiða. Svo það er nú ekki mikið um að vera hjá okkur, mest að gera hjá kokknum og vélstjórunum:). Og með því segir Marri yfir og út.

Kornið: Betra er vel gert en vel sagt.

Loðnuleysi........

Góðan dag gott fólk!  Hér um borð eru allir dauðhneykslaðir yfir ákvörðun stjórnvalda að stöðva loðnuveiðar um óákveðinn tíma. Á meðan milljarðar synda frá okkur eru hafrannsóknarskipin bundin við bryggju. Þeir hafa væntanlega ekki heyrt máltækið "þeir fiska sem róa". Við vitum það sem hafa stundað loðnuveiðar að það getur verið klukkustunda munur á veiðislóð þegar loðnan er annarsvegar, eina stundina ekkert og svo allt morandi þá næstu.

 En af okkur er það helst að við verðum búnir að fylla frystinn um eða eftir miðnætti og segja gangafréttir að það verði þegar hafist handa við löndun þegar frystirinn er fullur. En það kemur í ljós í dag hvort það verði landað fyrr.  Stórt skarð var höggvið í hóp bloggskrifara Hákons EA í gær þegar okkar ástsæli Golli Jó greindist með kviðslit. Það er trú okkar og von að hann hafi ekki kviðslitnað við bloggskrif en ef svo er þá fer maður að endurskoða þessa aukavinnu.  Óskum við Golla góðs uppskurðar og skjóts bata. Og með þessum orðum segir Marri yfir og út .

Gullkorn dagsins: Falskur vinur er eins og skugginn. Í sólskini er ekki hægt að losna við hann en þegar syrtir að er hann hvergi sjá. 

Byrjaðir aftur á fullum krafti!

Jú góðan dag gott fólk, við segjum það fína í dag eins og flesta daga, við erum byrjaðir að frysta á Japan og er bara fínasti gangur á þessu, komið eitt lag í lestina en aflin dugar eitthvað fram eftir morgni, en við vonum að kallinn fari að kasta nótinni svo vinnslan stopi ekki. Annars er bara fínt að frétta Árni er búinn að boða til fundar kl 13:45 í dag og er það svokallaður krísufundur vegna gengi Liverpool liðsins. Við fengum fersk andlit um borð í löndununni og svo við nefnum nöfn þá erum við að tala um menn á við Marra, Tobba, Tóta og Lárus Jhons. Gollinn segir yfir og út í bili og biður ykkur vel að lifa.

 Gullkorn dagsins:" Haf ekki hestaskipti í miðri á"